Milani mbyll vitin 2020 në “San Siro”, ndaj Lazio-s.
Skuadra kuqezi analizon një vit si protagoniste absolute, ku pas marsit kur edhe u mbyll futbolli, nuk ka pësuar asnjë humbje në Serie A dhe vetëm Lille e ka mundur në Europë.
Pioli dhe të tijtë, të cilët synojnë të kthehen në fushë më 2021 si të parët në renditje, thirren të përballen me një kundërshtar të vështirë, i cili në ndeshjen e fundit mposhti Napolin 2-0. Duke folur në konferencën për shtyp, trajneri kuqezi u ndal te disa tema.
“Fatkeqësisht, për momentin tifozët nuk janë në stadiume, por mund t’i dëgjojmë. Ne jetojmë me qytetin dhe ndiejmë afeksionin dhe pasionin e tyre. Na mungon kontributi i tyre në shkallë, por na japin energji. Po punojmë që t’u japim atyre kënaqësi.
Fitorja ndaj Sassuolo? Ishim shumë të mirë në drejtimin e lojës. Së pari kemi analizuar dy barazimet e mëparshme, në të cilat treguam më pak agresivitet, më pak vëmendje në mbrojtje dhe më pak intensitet. Goli i shpejtë na lejoi ta kontrollonim më mirë ndeshjen.
Nesër do të përballemi me një kundërshtar, që ka potencial të rëndësishëm sulmues, që sapo është kthyer nga fitorja ndaj Napolit. Do të jetë një lojë që vlen shumë. Na duhet një përpjekje e fundit për ta mbyllur këtë vit në mënyrën më të mirë të mundshme. Do të kemi disa mungesa, por jemi mirë”.
Vetëm një vit më parë, do të ishte e vështirë të imagjinohej Milani në këtë nivel: “Ne të gjithë jemi shumë krenarë për atë që po bëjmë. Pas nesh është një klub, që po na vë në një pozicion për të dhënë më të mirën tonë.
Jam krenar që jam pjesë e këtij klubi dhe trajner i këtij grupi lojtarësh, por tani duhet të qëndrojmë të përqendruar për ndeshjen kundër Lazio, sepse do të jetë shumë e rëndësishme”.
Juventusi dhe Interi mund të jenë dy rivalët më të rrezikshëm në garën për titull: “Ne gjithmonë duhet të japim më të mirën, pa menduar për klasifikimin. Do të shohim se çfarë do të ndodhë, por gjithsesi duhet të vazhdojmë të rritemi. Nesër do të luajmë një ndeshje të rëndësishme, thjesht do të duhet të mendojmë të bëjmë më të mirën.
Juventusi dhe Interi kanë cilësitë e tyre, por edhe ne kemi tonat. Po përpiqemi t’i zhvillojmë ato në maksimum. Kemi vend për përmirësim, thjesht duhet të shikojmë shtëpinë tonë, të bëjmë punën tonë. Dy të tjerët janë favoritë, thjesht duhet të mendojmë të bëjmë më të mirën deri në fund”.
Pioli foli për karakteristikat e lojtarëve që mund të vinin nga merkatoja: “Ato duhet të jenë profesionistë dhe të uritur, sepse duam të vazhdojmë kështu. Zona teknike e di që do të përfshijmë lojtarë vetëm nëse ata mund të jenë pjesë e Milanit, cilësitë nuk duhet të jenë vetëm teknike. Ne punojmë duke i kushtuar vëmendje gjithçkaje “.
2020-ta ka qenë një vit, që ka dhënë kënaqësi të jashtëzakonshme: “Momenti më i mirë? Ka pasur shumë, ne kemi arritur rezultate të rëndësishme. Kënaqësia më e madhe lidhet me atë që lojtarët e mi tregojnë çdo ditë. Të gjithë këtu duan të jenë ambiciozë. Dita më e mirë ishte ajo në të cilën Gazidis më komunikoi zgjedhjen për të vazhduar me mua dhe me këtë grup”.
